हार्दिक शुभेच्छा

माहिती अधिकार हा लोकशाहीचा पाया असून त्यामुळे राज्यातील कारभारात पारदर्शकता, खुलेपणा व जबाबदारीची जाणीव आणणे सुलभ झाले आहे. त्यामुळे जनतेला अधिक श्रम घेण्याची गरज नसून नियमांनुसार रीतसर अर्ज करून हवी असलेली कार्यालयीन व्यवहाराची माहिती सहज मिळवून घेण्यास मदत झाली आहे.

तथापि अधिकाऱ्यांनी त्यांच्या स्तरावर घेतलेले धोरणात्मक निर्णय केवळ नस्तीमध्ये न राहता जनतेसमोर वेळीच माहितीच्या अधिकारामुळे खुले झाले आहेत.

माहितीचा अधिकार अध्यादेशामधील मार्गदर्शक धोरणानुसार एकत्रित संकलित केलेली माहिती व जिल्हा परिषदेमार्फत ग्राम पातळीवर राबविल्या जात असलेल्या विविध योजनांची सर्वंकष माहिती संक्षिप्तपणे पुस्तिकेच्या माध्यमातून जनतेपर्यंत पोहोचल्यास त्याचा अनेकांना फायदा होईल. शिवाय खऱ्या अर्थाने ही पुस्तिका ग्रामीण भागात राहणाऱ्या नागरिकांसाठी मार्गदर्शक ठरेल व योजनेचा लाभ घेण्याच्या दृष्टिकोनातून महत्वपूर्ण व उपयुक्त ठरू शकेल.

नागपूर जिल्हा परिषदे अंतर्गत पंचायत समिती, कामठी यांनी प्रकाशित केलेल्या माहिती पुस्तिकेला माझ्या हार्दिक शुभेच्छा.

मनोगत

शासकीय व्यवहारात पारदर्शकता आणून शासकीय कामकाजाची व व्यवहाराची जास्तीत जास्त माहिती जनतेस मिळावी, याकरिता दिनांक १२.१०.२००५ पासून महाराष्ट्र माहितीचा अधिकार अध्यादेश-२००२ हा सर्वप्रथम महाराष्ट्र राज्यात लागू करण्यात आला.

त्यानुसार शासन स्तरावर माहितीच्या अधिकाराखाली निर्गमित झालेल्या शासन निर्णयांतील सूचनांची सर्व स्तरावर परिणामकारक अंमलबजावणी होण्यासाठी जिल्हा ते ग्राम स्तरावर शासकीय माहिती अधिकारी, अपील अधिकारी व सहाय्यक माहिती अधिकारी यांची नियुक्ती करण्यात आली आहे.

या आधी जनतेला कार्यालयाशी सतत पाठपुरावा करूनही शासकीय व्यवहाराची समाधानकारक अशी माहिती मिळत नव्हती आणि माहिती देताना कार्यालयासही अडचणी येत होत्या. त्यानंतर केंद्र शासनाने याची दखल घेऊन दिनांक १२ ऑक्टोबर २००५ पासून माहितीचा अधिकार अधिनियम, २००५ जम्मू आणि काश्मीर वगळता संपूर्ण भारतामध्ये लागू केला आहे.

जिल्हा परिषदेमार्फत ग्रामीण भागात राबविण्यात येत असलेल्या विविध योजनांची सर्वंकष माहिती आणि शासन स्तरासह जिल्हा परिषद स्तरावरील योजनाही या पुस्तिकेत समाविष्ट करण्यात आलेल्या आहेत. याचा उद्देश सर्वसामान्य नागरिकांना माहितीच्या अधिकारासंदर्भातील व पंचायत समिती, कामठी अंतर्गत विविध योजनांची माहिती उपलब्ध करून देणे हा आहे.

माहितीचा अधिकार व विविध योजनांची संक्षिप्त माहिती या पुस्तिकेत समाविष्ट करण्याचा आम्ही प्रामाणिक प्रयत्न केलेला आहे. तसेच अनवधानाने काही बाबींचा उल्लेख सुटलेला असण्याची शक्यता नाकारता येत नाही.

पंचायत समिती, कामठीच्या वतीने प्रथमच अशा प्रकारची माहिती पुस्तिका तयार करण्यात येत असून, आपणास आढळून आलेल्या त्रुटींची दखल घेऊन त्या सन २०२५-२६ मध्ये प्रकाशित होणाऱ्या माहिती पुस्तिकेत दुरुस्ती करून प्रकाशित करण्याचा आमचा प्रयत्न राहील व त्याबाबत आम्ही आपले आभारी आहोत.

बाळासाहेब यावले
गट विकास अधिकारी (गट-अ)
पंचायत समिती, कामठी